نكمل من حيث انتهينا في الحلقة الأولى :
- صحة صدور ماليش؟!
- تجيك السالفة، عمي صحة صدور ماليش؟!، كَال مال بطاقة السكن، كَتله : أنا عمك ليش، كَال : مو ضابط المركز ما كاتب اسمه بس كاتب ضابط أمن المركز، كَتله: جا عمي والتأييد شنو شغله؟! كَال : عمي روح ولا تأخرنا تره روحنه فايره . رحت جبت الورقتين، ملاهن وكَال روح للمدير، رحت للمدير ختمهن، وكَال روح صدرهن، رحت لبو الصادرة، كَال : هذين ختمين بعد ختم ارجع للمدير، كَتله : عمي جا غير هذا ختم المدير؟، كَال : عمي درووووووح ولا تضوجني، رجعت للمدير كَتله : استاد يكَول بعد ختم ، كَال : روح للمعاون، رحت للمعاون، ختمت ورجعت صدرت، وداعتك، كل واحد اوكف كَبال غرفته ربع ساعة بالسره!
- الله يساعدك، ورحت سويت صحة صدور؟!
- رحت يوم الثاني للمركز ، سووها الي وخلوها بضرف وكَالولي أخذها، أخذتها، رحت يوم الأخر
- صار سبعة ايام
- الساعة بثمانية اني وكَفت أباب الجنسية، بثمانية ونص طبيت للغرفة انطيته المعاملة وصحة الصدور، كَال : إي هسه صح ، تعال إبصم بصمت كَال روح إنتظر بصالة الأنتظار...
- يا الله
- وهيه شلون صالة إنتظار!، تكَول تنور وحاطينك بنصه!
- ليش ماكو تبريد؟!
- يا صخام!، الصالة صايرة بنص البناية، ومخلين مكيفات بالغرف ، تعرف المكيف يدفع الهوى الحار ليبره، وين راح يجي؟!
- للصالة طبعاً
- ومخلين مبردتين ما بيهن مي! وعدك الأحساب، الموظفين والمراجعين مسموطين سمط!
- اممممممممم، خلينا يم الجناسي اشصار عليهن؟!
- طلعت الوجبة الأولى، ماكو جناسيي، طلعت الوجبة الثانية، هم ماكو!، صارت الساعة 12 الظهر، زهكَت، رحت للغرفة : جا بويه وين جناسيي؟!، جان يكَلي: حجي وين جنت مو أسم أبو زوجتك ممبين زين . غير تجي؟ ، كَتله : عمي وأنا اشم إيدي؟ جا غير تصيح عليه وأني كَاعد بالصالة؟! كَال : يله حجي ما صار شئ، فد ساعة وتجيك الجناسي، روح استريح!
- راحت السوده!
- والله والساعة 2 الظهر ويصيحون بإسمي وأسماء عائلتي، وأخذ الجناسي وأكَلبهن ولنهم زينات ومابيهن شي
- هههههههههههههه إي قابل شبيهن؟!
- إي حقك تضحك، جا غير واحد كاتبينه إنثى، والآخر كاتبين عشيرته خطأ، أهوووووووو وشكد أخطاء بس أنا الحمدلله طلعن سلامات
- يا سلامات مو انت أسبوع عتعتوك اتعتعت
- زين أنت ما بدلت جناسيكم؟!
- أني أنطيت على كل جنسية 10 الاف وجابوهن الي للبيت، اشتريت راحتي
- أنا أخوك!
https://telegram.me/buratha
