( شعر : أبو أحمَد الحَداد المسعُودي )
حَزنانَه القَوافي سواد تِلبَسْ ثوبْ جايَه إويَه القَلم تِتناحَبْ : بعَبرَه!
تُخطْ تِكتِبْ تِونْ إمساهرَه بالليل مانامَتْ تِلُوليْ أوزانها : وتقرَه!
وَياها القَلَمْ بدمُوعَه يحجي الوَيلْ يطوي من الزَمنْ أيامَه : وبجَمرَه!
حيف إعلَه الأجندَه تموتْ يوم بيوم وإحنَه إنقارِعْ الطغيانْ : وإنقهرَه!
نِكتِبْ للصَبُر تاريخنَه إبأبطالْ وندَون الحَقيقَه الكُل زَمنْ :عِبرَه!
يعني اليوم بِسمَكْ ياوَطنْ عُنوانْ مكتوب الصَدُرْ بحرُوفَه : وبنَبْرَه!
رَسَم نُور المَحَبه برايَة العرفانْ مُحَمَد باقِر علومَه مَجِدْ :نَصْرَه!
سُلالَه تكامَلة أنسابها المُختارْ وَرثتْ للفَقاها درُوبها : إمحَيْرَه!
غَذَتْ لِلشَريعَه وكاتَبَتْها بزُودْ لَبْسَتْ لِلَعقيدَه أسْوارْ مِنْ : حِبْرَه
ياأمَة نَبينا ومَفخَرَتْ أجدادْ بيكُم أسوَه بالكَرار :والزَهرَه
واحِدكُم بطولَه وسيفَه باشِطْ نُورْ وإلسانَه مَحطَه تذيعْ كُل : فَتْرَه!
حيف إعلَه السياسَه إتواكِلَكْ مذبُوحْ وإنتَه إبن المَراجِلْ تِشْهَكِ : إبحَسرَه!
لِئَنْ إنتَه البَطلْ وأدريبَكْ إبوجدانْ ماتقبَلْ تشُوف الباطِلْ : إبكَصْرَه
ولاتِقبَل تِشِم مِنْ ريحةِ العُدوانْ ولاتِقبَلْ تُمُوتْ الكاعْ : مِنْدَثرَه
اليُوم العِراق الذِكرى تِرجَعْ ليه وإتشوفَه إبجَرحْ جَتالَه ما : يَبْرَه!
بَسْ لازِمْ نِسِنْدَه بصُولَةِ الفُرسانْ مَنخَليْ الدَخيلْ إويانَه ونحِكرَه!
ونْلِمْ بشَملنَه إنوَحِدْ الصِدكانْ بجفوفِ الوَطنْ ونحابِبِ البَصْرَه!
أبو جَعفَرْ عِلم بيبانَك بكُلْ دار يقرَه بسُورةِ الأنسانْ :يختَصرَه
إذا ردنَه العِلمْ بعيونَكْ إنحاجيه وبكُتبَكْ نُحُفظه إنخُطه ونقَدرَه
وإذا كلنَه السَجايه إتعاشِركْ أخلاق مانِغلَطْ لئنَك مِهْتِدي : إبعِتْرَه!
وإذا كِلْنَه الوَفاءْ إيلابِسَكْ جلبابْ إي والله بدليلْ وجلمِتَكْ : كُبْرَه
مانِرضَه الزمَنْ يرثيكْ لوينعيك مومَيتْ فِكركُمْ سيدي إبأجيالنا: إنظُفرَه!
تِظَل خالِد رمِز جَفينَكْ بكُل إيدْ تِتْصافَح جِهاد وصُورتَكْ : كَمْرَه !
عِراقََكْ مِنتصِرْ والطاغي ولَه وماتْ صادُونَه بحيفيرَه وطامِرْ : إبنُكرَه
شَنقُونَه بحَبِلْ مَخيوط لِلجُرذان مَذمُوم الخَسيسْ إبعارَه وبعُمرَه!
بُكيتْ إنتَه بحَقيقَه حرُوفَكْ منْ جديدْ نُحفُظها ونِدَرْس علُومْها : الأسرَه
لئنْ خَطَكْ سياسَه إميزَنه بالدينْ وبفكرَكْ روايَه آفاقها :إمنَوْرَه
نِقرَه الفاتحَه الرُوحَك يَبَعْدِ الرُوح ونخَلِدْ شَهَر نَيسان بالذِكرَه!
تمت ولله الحمَدهولَنده2008م
نُظِمَتْ في ذكرى الشهيد آية الله السيد مُحمد باقِر الصَدر رحِمَهُ الله .
https://telegram.me/buratha
